Күүстээх мадьыны, “Дыгын оонньуулара” хас да төгүллээх призера, норуокка Таас Боотур диэн аатынан биллэр Дьулустаан Ноговицын тапталлаах кэргэниниин, нарын-намчы, үҥкүүһүт идэлээх Виолетталыын үс оҕо амарах төрөппүттэрэ буолаллар. Аныгы олох сиэринэн, ыал ийэтэ “Инстаграм” ситимигэр күннээҕи дьиэ-уот түбүгүн сырдатан, хаһаайка быһыытынан араас туһалаах сүбэлэрин кытта ааҕааччыларыныын үллэстэр.

Биһиги ыҥырыыбытын ылынан, “Famtoday” саайт ааҕааччыларыгар Виолетта Ноговицына бүгүн ыалдьыттыыр.
Виолетта, үтүө күнүнэн! Эйигинниин сарсыарда алтыһа олорор буоламмын, маннык ыйытыктаахпын. Элбэх оҕолоох ийэ саҥа күнэ хайдах саҕаланарый?
Дорооболоруҥ! Биллэн турар, киһи доруобуйата чөл буоларыгар күннээҕи аһылык сүҥкэн оруоллаах. Ол иһин сарсыарда уһуктаат, бүгүн дьиэлээхтэрбэр тугу астаан күндүлүүбүн диэн толкуйдаабытынан барабын. Киһи иҥэмтиэлээх аһылыгы аһаатаҕына күн устата үчүгэй настырыанньалаах уонна сэниэлээх буолар. Ол иһин дьиэ кэргэним аһылыгар болҕомто уурартан күнүм саҕаланар диэхпин сөп. Син биир бары ийэлэр курдук дьиэни-уоту хомунан, оҕолору аһатан-сиэтэн күнүм салгыы саҕыллан баран иһэр. Арай, билигин иллэҥ бириэмэлэннэхпинэ блогпун сайыннарабын, куйаар ситимигэр эҥин араас туһалааҕы устабын, кыыс аймахха, ийэлэргэ, кыргыттарга сыһыаннаах контент оҥорорбун сөбүлүүбүн. Өссө аҕабыт өрүүр күнүгэр кыралаан торт астаан атыылыыбын. Биһиэхэ кэргэним ийэтэ Людмила Михайловна көмөлөһөр буолан, күннээҕи түбүк таһынан, бэйэбин сайыннарарбар кыах баара наһаа үчүгэй.
Блогер буолар хайдах эбитий? Сөбүлүүр дьарык диэххэ сөп дуо, чопчу блогерствоны?
Чиэһинэ эттэххэ, мин блогер буолуохпун олус баҕарар этим. Дьиҥэр, инстаҕа тус сирэйбин 2020 с. сайыннаран саҕалаабытым. Ол бириэмэҕэ мин иккис оҕобунан ыарахан буолбутум, онно эбиитин хамсык ыарыыта сытыырхайан турар кэмэ этэ. Наар кэлэ-бара сылдьыбыт, артыыс идэлээх киһи биирдэ дьиэҕэ хаайыллан хаалбыппар сүрдээҕин соһуйбутум. Онно бастаан “тугу эрэ гыныахха наада эбит” диэн санаа киирбитэ. Салгыы үһүс оҕобунан субуруччу дьиэҕэ олоруу буолбута (наһаа истиҥник мичээрдиир). Онно торт астыырга үөрэнэммин, олус туһалаахтык күммүн атаарар буолбутум.
Мин инстаграмҥа страницабын күннэтэ көрөр, ааҕаар сурутааччыларбын кытта санаа үллэстэрбин сөбүлүүбүн. Бэйэм өттүбүттэн туһалаах сүбэлэри сырдатабын. Туох да куһаҕан иҥмэтэх, ыраас санаа аргыстаах, дьоҥҥо туһалаах буоллун диэн санааттан блогпун сайыннаран үлэлэтэбин. Бу эйгэни олус сөбүлээтим.
Инстаграмынан көрдөххө, бириэмэҕитин аттаран, Дьулустуун оҕолоргутун кытта үгүстүк алтыһар, бииргэ оонньуур, бириэмэҕитин бииргэ атаарар эбиккит. Үгүс төрөппүттэргэ ити үтүө холобур буолан көстөрө саарбахтаммат. Оҕону иитиигэ туох эмэ кистэлэҥнээххит дуо?
Биһиги туох да ураты кистэлэҥмит суох. Саамай сүрүнэ оҕолорбут үтүө санаалаах, дьоһун дьон буолалларын ыралыыбыт. Ол иһин элбэхтик кинилэри кытта кэпсэтэрбитин, бииргэ оонньуурбутун олус сөбүлүүбүт.
Төрөппүт икки ардыгар убаастабыллаах, харыстабыллаах сыһыан баар буоллаҕына оҕолор ону көрөн улааталлар диэн санаанан салайтарабыт.

Дьиэҕэ төрөөбүт тылбытын өрө тутабыт, бэйэ икки ардыгар сахалыы кэпсэтэбит. Кыыспыт саха кылааһыгар үөрэнэр. Төрөөбүт төрүт тылбыт инникилээх буоларыгар, сүтэн-симэлийэн хаалбатыгар баҕарабыт. Ол иһин эдэр төрөппүттэргэ, төһө кыалларынан оҕолоргутун сахалыы иитиҥ диэн сүбэлиэ этибит. Биһиги оҕолорбут кэнэҕэски хайдах киһи буолан улааталлара төрөппүттэртэн эрэ тутулуктаах. Төрөөбүт тылын билэр, саҥарар оҕо харыстабыллаах, ураты күүстээх, бэйэтигэр эрэллээх буолар дии саныыбыт.
Виолетта, аны үлэ чааһыгар киириэххэ. Үҥкүүһүт идэлээххин дуо?
Мин 2012 с. Наталья уонна Аксинья Посельскаялар ааттарынан балет оскуолатын бүтэрбитим уонна Сергей Зверев-Кыыл Уола аатынан Үҥкүү тыйаатырыгар үлэлии киирбитим. Тапталлаах тыйаатырбар 2020 с. оҕолоно барыахпар диэри умсугуйан туран сылдьыбытым. Солистка да быһыытынан, араас спектакльларга сүрүн оруоллары да толорон, олус таһаарыылаахтык үлэлээбитим. Билигин коллективпын олус аҕынным, суохтаатым. Этэҥҥэ оҕолорум улааттылар эрэ, үлэбэр тахсар былааннаахпын.


Виолетта, мин эйиэхэ үгүс ийэлэри долгутар биир ыйытыылаахпын. Тас көстүү чааһыгар. Биһиги бары наар кырасыабай, ырыган буолуохпутун баҕарабыт. Эн субу-субу оҕолонон баран, тас көрүҥҥүн, доруобуйаҕын хайдах чөлүгэр түһэрэҕиний?
Киһи бэйэтин сиэркилэҕэ көрөн таптыахтаах уонна сөбүлүөхтээх дии саныыбын. Билигин аныгы үйэҕэ Ютубка эти-хааны эрчийэргэ аналлаах сүбэлэр, тэттик видеолар дэлэйдэр. Ону көрөн дьиэҕэ кыралаан хамсанабын. Наһаа турунан буолбакка, аргыый наллаан нэдиэлэҕэ иккитэ эҥин дьарыктанабын. Аны туран, үс оҕолоох буоламмын, дьиэ да иһигэр сүүрэрим-көтөрүм олус элбэх. Оннук сылдьан киһи чөлүгэр түргэнник түһэр эбит.
Хонон баран дорообо диэбиккэ дылы, бүтэһиккэ хантан сыдьааннааххын билиэххэ. Хантан хааннааххыный?
Биһиги Дьулустуун иккиэн биир дэриэбинэттэн сылдьабыт. Горнай улууһун Одуну нэһилиэгиттэн силис тардыылаахпыт. Кини да, мин да, төрөппүттэрим спорду уонна культураны өрө туппут дьон буолаллар. Кинилэр үтүө холобурдарыгар улааппыт буоламмыт, оҕолорбутун олоххо көхтөөх буоларга иитэ сатыахтаахпыт. Билигин уолаттар кыралара бэрт, оттон кыысчааммыт хайыы-үйэ оскуолатыгар көхтөөх үөрэнээччи. Куйаар да ситиминэн ыытыллар хоһоон ааҕыытын эҥин күрэхтэригэр элбэхтик кыттыбыта. Кыыспар үҥкүү туруоран, араас эҕэрдэ нүөмэрдэргэ, бырааһынньыктарга кытыннарабын. Бэйэм культураҕа сыстаҕас буоламмын, кинини эмиэ ити хайысхаҕа сыһыарабын. Бэйэтэ хоһоон ааҕарын уонна үҥкүүлүүрүн наһаа сөбүлүүр. Аҕабыт кэнэҕэски уолаттарбын спорт өттүгэр сыһыарыам диэн баҕа санаалаах.

****
Олох үтүө эрэ өрүтүн батыһар, чөл туруктаах, ыраас санаалаах Ноговицыннар дьиэ кэргэн күн-күбэй ийэлэригэр Виолеттаҕа истиҥ кэпсээнин иһин махтанабыт! Эһиги олоххо көхтөөх көрүүгүт эдэр дьоҥҥо үтүө холобур буоллун! Чэгиэн, доруобай буолуҥ!
Виолетталыын астыахха!

Хас биирдии бырааһынньыккка салаат арааһын астанабыт. Бүгүн мин кэргэним Дьулус саамай сөбүлүүр салаатын рецебын кытта үллэстиэхпин баҕарабын.
Биһиэхэ наада:
- Ынах этэ
- Оҕурсуу
- Минньигэс перец
- Чеснок
- Хара перец
- Туус
- Соевай соус
- Кунжут
Эппитин уһун синньигэс гына кырбаан баран, мас арыытыгар ыһаарылыыбыт. Онно чесногу бытархай гына кырбаан кутабыт, салгыы хара перец, туус уонна соевай соус бэйэбит баҕабытынан көрөн кутабыт. Салгыы минньигэс перецпытын уонна оҕурсууну уһун синньигэс гына быһан баран, ыһаарыламмыт эппититин кытта тэҥҥэ булкуйан кэбиһэбит. Бу салаат ханнык баҕар бырааһынньыктааҕы сандалыны киэргэтэр, көстүүтэ олус кырасыабай буолар. Өссө кырасыабай буоллун диэн саамай бүтэһиккэ кунжут таммалатан биэрэбит. Минньигэстик аһааҥ!
Бэлэмнээтэ
Екатерина Афанасьева.